VVE-mi inuuneq
Efterskole Villads Villadsen-imi ilinniartutut ataatsimoornermi imaannaanngitsumi peqataassaatit. Puigugassarinngisarnik misigisaqassaatit, inersimasunngorlutillu inerissaatit inuunerpillu sinnerani ikinngutitaarlutit.

Kisianni tamakku namminneq takkunneq ajorput. Illit nammineq tamaviaarnissat pimoorussinissallu pisariaqartorujussuuvoq. Taamatut iliornissannut sapiissuseqassaatit aamma atuarfik, atuaqatitit atuarfimmilu sulisut naapinnissaannut akuersaartuussallutit.

Ullunut assigiinngitsunik sammisassarpassuaqarpoq. Assigiinngitsorpassuarnut peqataaffissarpassuaqarpoq. Ilinniartut ilaannut sungiukkuminaassinnaavoq. Kisianni tamakku tamarmik ilaapput. Ukiumut atuarfiusumut pitsaasumik angusaqarnissatsinnut sammisassat ilinniartitaanermullu piffissaq atugarput pingaaruteqarpoq.

Niviarsiaqqat nukappiaqqallu inaat immikkoortinneqarsimapput gangini immikkorlutik, inini marluuttarissani sisamaattarissaniluunniit ilinniartut najugaqassapput. Sapinngisarput tamaat angerlarsimaffippalaartumik avatangiiseqarnissamut iliuuseqassaagut. Niviarsiaqqat nukappiaqqallu inii sanileriissapput.

Ullaakkorsiornermut, ullup qeqqasiornermut unnukkorsiornermullu pinngitsoorani takkunnissaq piumasaqaataavoq. Ullup ingerlanerani akunnerinnakkut nerilaartoqarnissaanut periarfissaqassaaq.

Ilinniartut nikittaallutik igaffimmi ikiuuttassapput. Ukiup ingerlanerani ataasiarluni marloriarluniluunniit sapaatip akunnera ataaseq igaffimmiittoqartassaaq